Na mboka na biso tozali na bilei ndenge na ndenge. Na bibale, na mangala pe miluka  tokolobo  mbisi ya lolenge nyoso . Tokotanga ata mboto, monganza, mbenga, mongusu, malangwa, makoku ,nzombo, ngolo  pe bongo na bongo. Na zamba tokosalaka bokila  pe tokozuaka    nyama nzike. Ezala ata mboloko, simbiliki , mpakasa to pe basusu.Na mboka tokobokolo bibwele lokola ngombe ,nsoso, mabata mpe nyama esusu lokola ntaba , meme.

Tozali pe na nyama ikeke lokola mbinzo, makelele, mpose  pe bongo na bongo.Na oyo etali   ndunda tokolonaka ndunda  ndakisa lokola matembele, ngayingayi,pondu,madesu, mbika, mayebo, mbuengi , pe misusu ebele .Tokoliaka bilei bya biso na nsongo, na kwanga, na fufu ya nsongo pe  fufu ya masangu, loso,  mabenge, mbala , mboma, makemba. Na bikelakela ya lompimbo , tozali na matungulu, ndembi, tomato, pilipili, tangawusi, nsóló, pe bongo na bongo

Soki totali ngambo ya mafuta , tozali bongo na mafuta ya mbila, mafuta ya nguba, pe na mwamba nguba , mosaka. Oyo totangi nde bilei   ya bato ya  ekolo Kongo.  

Lolenge ya kolamba pondu:

Mpo na kolamba pondu tokosala boye.Nakosukola pondu eye nasombaki mpo na kolongola bosoto nyoso. 

Na sima nakotokisa yango tii soki elembi naluboli yango pe nakttia na eboka mpo na kotuta elemba penza. Wana nakotiaka pe bikela ya lompimbo lokola matungulu, pilipili  , nsolo, pe misusu.

Soki nasilisi kotuta pondu, nakotia yango kati ya nzungu po na kolamba . wana nakotika boye etoka penza tii solo ya mobesu elongwa. 

Sima nakobakisa mbisi lokola mongusu to pe misusu ya kokauka na mpe mungwa o kati ya nzungu po ebela esika moko na pondu. 

Soki namoni ‘te ekomi kobimisa nsolo ya kobela wana nakosopa mafuta ya mbila likolo ya pondu po epesa yango supu ya kitoko

Nakofandisa na moto tiii sima ya mwa ntango nde nakomono ‘te ebeli , wana nakolubola yango po na kolia na loso oyo elambemaki pembeni  to mpe kwanga to fufu .. 

About The Author

Leobanem Bolenge-Ngbanzo

éditeur

See author's posts